---- एक प्रेरणादायी लेख ------"वाचन प्रेरणा दिन — विचारांची नवी पहाट"

प्रा.राहुल डोंगरे.

वाचलं की मन उघडतं, विचारांना मिळते दिशा,

ज्ञान प्रकाशात उमलते जीवनाची परिभाषा!

१५ ऑक्टोबर — मिसाईल Man भारतरत्न डॉ. ए. पी. जे. अब्दुल कलाम यांचा जन्मदिन!

हा दिवस “वाचन प्रेरणा दिन” म्हणून साजरा करण्यामागचा हेतू म्हणजे — प्रत्येक भारतीयाच्या मनात ज्ञानप्रेमाची ज्योत प्रज्वलित करणे.

डॉ. ए.पी.जे.कलाम म्हणत, “Reading makes you wise, thinking makes you creative, and knowledge makes you great.”

आजच्या घाईच्या जगात वाचन हे केवळ छंद नाही, तर जीवन समृद्ध करण्याचं सामर्थ्यवान साधन आहे.

विद्यार्थी : वाचन म्हणजे यशाचा पाया:-

विद्यार्थ्यांसाठी वाचन हे पंख आहे, ज्यावरून ते आपल्या स्वप्नांना उड्डाण देतात.

दररोज थोडं वाचणारा विद्यार्थी केवळ परीक्षेत नाही तर आयुष्यातही उत्तीर्ण ठरतो.

वाचनामुळे कल्पनाशक्ती, भाषाशैली, आत्मविश्वास आणि निर्णयक्षमता विकसित होते.

एक चांगलं पुस्तक म्हणजे एका चांगल्या गुरूचा सहवास.

म्हणून विद्यार्थी मित्रांनो — मोबाईलपेक्षा पुस्तक जवळ ठेवा, कारण पुस्तक तुम्हाला कधीच चुकीचा सल्ला देत नाही!

कर्मचारी : वाचन म्हणजे प्रगतीचा मार्ग:-

कामाच्या धकाधकीत वाचनासाठी वेळ काढणे कठीण वाटते, पण वाचन हेच व्यक्तिमत्त्व आणि कामगिरी सुधारण्याचं गुपित आहे.

प्रत्येक कर्मचारी जर स्वतःच्या क्षेत्राशी निगडित नवीन गोष्टी वाचत राहिला, तर तो केवळ कामगार राहत नाही — तो उत्कृष्ट कर्मयोगी बनतो.

वाचन आपल्यात शिस्त, सर्जनशीलता आणि नेतृत्वगुण निर्माण करतं.

सामान्य नागरिक : वाचन म्हणजे जबाबदार नागरिकत्व:-

सामान्य नागरिकासाठी वाचन हे जागरूकतेचं शस्त्र आहे.

वाचनातून आपल्याला अधिकार, कर्तव्य, संविधान आणि समाजाच्या घडामोडींची जाण होते.

वाचणारा समाज प्रश्न विचारतो, आणि प्रश्न विचारणारा समाजच परिवर्तन घडवतो.

                  संकलन/संग्रहक

            संजीव भांबोरे,(पत्रकार),

            हर्षवर्धन देशभ्रतार(Ectm.)