शाळा वाचविण्यासाठी शिक्षक संघटना सरसावल्या.

​• ५ डिसेंबरच्या आंदोलनात लाखनी तालुक्यातील १००% शाळा बंद करण्याचा निर्धार.

नरेंद्र मेश्राम 

"साप्ताहिक जनता की आवाज"

 

लाखनी :- राज्य सरकारने कमी पटसंख्या असलेल्या शाळा बंद करण्याचा जो निर्णय घेतला आहे, त्याला विरोध करण्यासाठी तसेच टीईटी (शिक्षक पात्रता परीक्षा) सक्ती, जुनी पेन्शन योजना आणि इतर मागण्यांसाठी सर्व प्राथमिक, माध्यमिक व उच्च माध्यमिक शिक्षक-शिक्षकेत्तर संघटनांनी राज्यव्यापी शाळा बंद आंदोलनाची हाक दिली आहे. याच पार्श्वभूमीवर, लाखनी तालुक्यात या आंदोलनाच्या नियोजनासाठी एक महत्त्वपूर्ण सभा दिनांक २९ नोव्हेंबर २०२५ रोजी सायंकाळी सहा वाजता बस स्टॉप लाखनीच्या उद्यानात संपन्न झाली. सभेच्या अध्यक्षस्थानी पुरुषोत्तम झोडे होते, तर शिक्षक भारतीचे जिल्हा अध्यक्ष उमेश सिंगनजुडे यांनी प्रमुख मार्गदर्शक म्हणून उपस्थितांना मार्गदर्शन केले. महाराष्ट्र राज्य प्राथमिक शिक्षक समितीचे राज्य कार्यकारिणी सदस्य श्रीधर काकीरवार व जुनी पेन्शन संघटनेचे विवेक हजारे प्रमुख अतिथी म्हणून उपस्थित होते. ​या सभेत ५ डिसेंबर २०२५ रोजी होणाऱ्या राज्यव्यापी सामूहिक आंदोलनात लाखनी तालुक्याच्या वतीने १०० टक्के शाळा बंद ठेवून मोर्चात सहभागी होण्याचा निर्णय सर्वानुमते घेण्यात आला. यानुसार, लाखनी तालुक्यातील संपूर्ण केंद्रामध्ये आंदोलनात प्रभावीपणे सहभागी होण्यासाठी प्रत्येक केंद्राची जबाबदारी निश्चित करण्यात आली. ​महत्त्वाचे मत: ​श्रीधर काकीरवार, राज्य कार्यकारिणी सदस्य, महाराष्ट्र राज्य प्राथमिक शिक्षक समिती, म्हणाले, "प्राथमिक शाळेतील सर्व शिक्षकांनी या आंदोलनात सहभागी व्हावे. हे शाळा बंद आंदोलन केवळ शिक्षकांसाठी नसून ते शाळा वाचविण्यासाठी आणि तरुणांचे रोजगार वाचविण्यासाठी आहे." ​उमेश सिंगनजुडे, जिल्हाध्यक्ष शिक्षक भारती संघटना भंडारा, यांनी सांगितले की, "या आंदोलनाला शिक्षण संस्था चालक महामंडळाचा पूर्ण पाठिंबा आहे. शिक्षण, शाळा आणि शिक्षक वाचविण्यासाठी खाजगी शाळांतील शिक्षकांनी उत्स्फूर्तपणे सहभागी होणे आवश्यक आहे. ​याप्रसंगी सूर्यभान टिचकुले, सतीश वासनिक, धनराज मेश्राम, प्रशांत गजभिये, राजकुमार खोब्रागडे, विजय गरपडे, विठ्ठलजी हारगुडे, अविनाश नगरकर, गौतम वाहने,यांच्यासह अनेक पदाधिकारी उपस्थित होते. ५ डिसेंबरच्या मोर्चात सहभागी होण्यासाठी १०० टक्के शाळा बंद आंदोलन होणार असल्याने लाखनी तालुक्यात शिक्षक संघटनांची अभूतपूर्व एकता दिसून आली. ​सभेचे सूत्रसंचालन योगीराज देशपांडे यांनी केले, तर आभार प्रदर्शन उमेश गायधने यांनी केले.