गोंदिया : उमेदवार निवडताना पक्ष नाही तर उमेदवाराचे व्यक्तिमत्व पाहून मत द्या - दुर्गाप्रसाद घरतकर.

नरेंद्र मेश्राम 

"साप्ताहिक जनता की आवाज".

गोंदिया/भंडारा : - गोंदिया जिल्ह्यातील आगामी नगरपरिषद आणि नगरपंचायत निवडणुकीच्या पार्श्वभूमीवर योग्य उमेदवाराची निवड कशी करावी याबाबत मार्गदर्शन करताना गोंदिया जिल्ह्यातील युवा आदिवासी कार्यकर्ते व ‘डिजिटल गावकरी मराठी मीडिया’चे संपादक दुर्गाप्रसाद घरतकर यांनी महत्त्वाचे मुद्दे मांडले. पत्रकारांशी बोलताना घरतकर म्हणाले की, निवडणुकीत फक्त ओळख किंवा पक्षनिष्ठा पाहण्यापेक्षा नागरिकांनी उमेदवाराच्या कामगिरीचा वस्तुनिष्ठ आढावा घेणे अत्यावश्यक आहे.

घरतकर यांच्या मते, गेल्या पाच वर्षांत प्रत्यक्षात कोणत्या उमेदवाराने काम करून दाखवले याचा हिशेब घेणे गरजेचे आहे. शहरातील रस्त्यांची स्थिती, पाणीपुरवठा, स्वच्छता आणि मूलभूत सुविधांतील सुधारणा या घटकांवर नागरिकांनी लक्ष केंद्रीत करावे. फक्त घोषणांवर किंवा आश्वासनांवर विश्वास ठेवण्याऐवजी प्रत्यक्ष कामाची नोंद तपासणे आवश्यक असल्याचे त्यांनी सांगितले.

ते पुढे म्हणाले की, गुन्हेगारी पार्श्वभूमी असलेल्या व्यक्तींना प्रशासनात स्थान देणे धोकादायक ठरू शकते. पारदर्शक कामकाज, शिस्तबद्ध वर्तन

आणि जबाबदारीची जाणीव असलेली व्यक्तीच लोकांच्या अपेक्षा पूर्ण करू शकते. शहरातील तातडीच्या समस्या समजून घेणारा आणि त्यावर प्रत्यक्ष उपाययोजना करणारा उमेदवार निवडला पाहिजे, असेही घरतकर यांनी स्पष्ट केले. नालेसफाई, पाणीटंचाई, कचरा व्यवस्थापन किंवा वाहतूक—या प्रश्नांची मूळ कारणे व परिणामकारक उपाय ज्याला माहीत आहेत, तोच खरा बदल घडवू शकतो.

पक्षनिष्ठेपेक्षा व्यक्तिमत्व महत्त्वाचे असल्याचे घरतकर यांनी स्पष्टपणे नमूद केले. पक्ष कोणताही असो, व्यक्तीची प्रामाणिकता, जबाबदारी आणि लोकांसोबतचा संवाद महत्त्वाचा आहे. निवडणूक ही फक्त राजकीय स्पर्धा नसून नागरिकांच्या भविष्यासाठी घेतला जाणारा निर्णय असल्याचे त्यांनी सांगितले. गोंदिया जिल्ह्यातील तरुणांचा सहभाग वाढत असून अभ्यासू, तंत्रज्ञानाची जाण असलेले आणि संवादकुशल नेतृत्व पुढे येणे आवश्यक असल्याचेही त्यांनी मत व्यक्त केले.

शेवटी घरतकर यांनी नागरिकांना आवाहन केले की, पैशाच्या, दबावाच्या किंवा अल्पकालीन फायद्यांच्या आधारावर मतदान करू नये. मतदान हा अधिकार असून त्याचा वापर विचारपूर्वक आणि जबाबदारीने करणे ही प्रत्येकाची कर्तव्य आहे. योग्य उमेदवाराची निवड झाली तरच शहराचा विकास घडेल, असा विश्वासही त्यांनी व्यक्त केला.