महिला आरक्षणाच्या नावाखाली भाजपचा 'राजकीय गेमप्लॅन' उघड; चरण वाघमारे यांचा महायुतीवर हल्लाबोल.

नरेंद्र मेश्राम 

"साप्ताहिक जनता की आवाज" 

भंडारा :- केंद्रातील मोदी सरकारने केवळ **पाच राज्यांच्या विधानसभा निवडणुकीत राजकीय फायदा होईल या हेतूने संसदेचे विशेष अधिवेशन बोलावून महिला विधेयक मंजुरीसाठी आणले.** मात्र, हे विधेयक महिलांच्या सक्षमीकरणासाठी नसून, उत्तर भारतातील राज्यांमध्ये जागा वाढवून स्वतःची सत्ता टिकवण्यासाठी रचलेला एक कुटिल डाव आहे," अशी घणाघाती टीका **राष्ट्रवादी काँग्रेस पार्टी (शरदचंद्र पवार) पक्षाचे भंडारा जिल्हाध्यक्ष चरण वाघमारे** यांनी केली आहे.

संसदेच्या विशेष सत्रात महिला आरक्षण अंमलबजावणीवरून झालेल्या घडामोडींवर वाघमारे यांनी सरकारची पोलखोल केली.

*परिसीमन आणि राजकीय हेतूवर प्रहार:**

वाघमारे यांनी सरकारचा डाव उघड करताना खालील महत्त्वाचे मुद्दे मांडले:

 * **निवडणुकीसाठी इव्हेंट:** पाच राज्यांच्या निवडणुका डोळ्यासमोर ठेवून हे विधेयक आणले गेले. जर सरकारची नियत साफ असती, तर २०२३ मध्ये मंजूर झालेले हे विधेयक **२०२४ च्या लोकसभा निवडणुकीत का लागू केले नाही?** असा सवाल त्यांनी उपस्थित केला.

 * **जागा वाढीचा सापळा:** मोदी सरकारने जाणीवपूर्वक महिला आरक्षणाला 'परिसीमन' (मतदारसंघ पुनर्रचना) जोडले आहे. उत्तर भारतात वाढत्या लोकसंख्येमुळे खासदारांची संख्या वाढवून त्याचा फायदा महायुतीला मिळवण्याचा हा प्रयत्न आहे.

 * **प्रगत राज्यांवर अन्याय:** महाराष्ट्र आणि दक्षिण भारतातील राज्यांनी लोकसंख्या नियंत्रण केले आहे. मात्र, मतदारसंघांची संख्या वाढवण्याच्या अटीमुळे या राज्यांचे संसदेतील महत्त्व कमी करण्याचा प्रयत्न होत आहे. केवळ महायुतीचा राजकीय फायदा पाहणाऱ्या या धोरणाला विरोधकांनी चोख प्रत्युत्तर दिले आहे.

 **इंडिया (INDIA) आघाडीची मागणी:**

चरण वाघमारे पुढे म्हणाले की, "इंडिया आघाडीची मागणी अत्यंत स्पष्ट होती की, **सध्या असलेल्या ५४४ खासदारांच्या संख्येवरच ३३ टक्के महिला आरक्षण त्वरित लागू करावे.** खासदारांची संख्या पाचशेच्या वर असताना आरक्षण देण्यासाठी नवीन मतदारसंघ वाढीची वाट कशाला पाहायची? विरोधकांनी केंद्र सरकारचा हा कुटिल डाव ओळखून तो हाणून पाडला, याचे आम्ही स्वागत करतो."

**पवार साहेबांचा वारसा आणि जनतेचा कौल:**

ज्या महाराष्ट्रात शरदचंद्रजी पवार साहेबांनी १९९४ मध्येच महिलांना आरक्षण देऊन सत्तेत वाटा दिला, तिथे आज भाजप केवळ पोकळ घोषणा करत आहे. 'नारी शक्ती वंदन' पदयात्रा काढण्याची भाषा करणाऱ्यांनी आधी महिलांच्या फसवणुकीचे उत्तर द्यावे. आगामी काळात जनता या भूलथापांना बळी पडणार नाही आणि महायुतीला योग्य धडा शिकवेलअसा इशारा वाघमारे यांनी दिला.