जाग्रूती लेख जागतिक पुस्तक दिन.

ज्ञान हीच खरी शक्ती आहे, आणि पुस्तक हे त्या शक्तीचं सर्वात प्रभावी साधन आहे. इतिहास साक्षी आहे की ज्यांच्याकडे ज्ञान असतं, तेच समाजाला दिशा देतात. पण या देशात एक काळ असा होता, जेव्हा काही लोकांना केवळ त्यांच्या जन्मामुळे पुस्तक वाचण्याचा हक्कही नाकारला गेला होता.

अशाच प्रतिकूल परिस्थितीतून उभा राहिलेला एक महामानव म्हणजे डॉ. बाबासाहेब आंबेडकर. ज्यांना लहानपणी शाळेत बसण्याचा, पाणी पिण्याचा, आणि अगदी शिक्षण घेण्याचाही अपमान सहन करावा लागला… त्याच व्यक्तीने पुढे ज्ञानाची अशी ज्योत प्रज्वलित केली की ती आज संपूर्ण भारताला मार्गदर्शन करते.

डॉ. आंबेडकरांनी केवळ पुस्तके वाचली नाहीत, तर त्यांनी पुस्तकांमधून विचारांची क्रांती घडवली. त्यांच्या अभ्यास, चिकाटी आणि ज्ञानप्रेमामुळेच त्यांनी भारतीय संविधानाची निर्मिती केली — एक असे पुस्तक, ज्यावर आजचा भारत उभा आहे. हे केवळ कायद्याचं पुस्तक नाही, तर समानता, स्वातंत्र्य आणि बंधुतेचा मार्गदर्शक दीपस्तंभ आहे.

जागतिक पुस्तक दिन आपल्याला फक्त वाचनाची सवय लावण्याची आठवण करून देत नाही, तर ज्ञानाच्या माध्यमातून स्वतःला आणि समाजाला उन्नत करण्याची प्रेरणा देतो. पुस्तक हे केवळ अक्षरांचा संच नसतो, ते विचारांचा खजिना असतो. प्रत्येक पुस्तक आपल्याला नवीन दृष्टीकोन देतं, विचारांना दिशा देतं आणि जीवन अधिक समृद्ध करतं.

आजच्या डिजिटल युगात माहिती सहज उपलब्ध असली तरी पुस्तक वाचनाची गोडी कमी होत चालली आहे. परंतु, खरी समज, सखोल विचार आणि व्यक्तिमत्त्व विकासासाठी पुस्तक वाचन अत्यावश्यक आहे.

चला, या जागतिक पुस्तक दिनी आपण एक संकल्प करूया!..

दररोज काही वेळ वाचनासाठी देऊया,

ज्ञानाचा दीप स्वतःमध्ये प्रज्वलित करूया,

आणि समाजातही प्रकाश पसरवूया.

कारण, एक चांगलं पुस्तक तुमचं आयुष्य बदलू शकतं…

आणि एक जागरूक वाचक संपूर्ण समाज बदलू शकतो.

 विनम्र अभिवादन त्या ज्ञानसूर्याला, ज्यांनी अंधारातून प्रकाशाकडे नेणारा मार्ग दाखवला.

 

.              डॉ.प्रा.देवानंद बि. नंदागवळी