शिवसेना उद्धव बाळासाहेब ठाकरे पक्षा च्या शिष्टमंडळाची नायब तहसीलदारांकडे तक्रार.

• गॅस एजन्सींवर भ्रष्टाचार व काळाबाजाराचे गंभीर आरोप.

सोनु संजीव क्षेत्रे 

"साप्ताहिक जनता की आवाज"

 

उल्हासनगर :- दि. २१ एप्रिल २०२६ – शिवसेना उद्धव बाळासाहेब ठाकरे पक्षाच्या शिष्टमंडळाने आज नायब तहसीलदार यांची भेट घेऊन उल्हासनगर शहरातील दोन प्रमुख गॅस एजन्सींविरोधात गंभीर आरोप केले आहेत. या एजन्सींमध्ये होणाऱ्या भ्रष्टाचार, काळाबाजार व ग्राहक फसवणुकीबाबत तातडीने तपासणी व कारवाई करण्याची मागणी या वेळी करण्यात आली.

शिष्टमंडळाने नायब तहसीलदार यांच्याकडे सादर केलेल्या निवेदनात म्हटले आहे की, उल्हासनगर-४ मधील एचपी गॅस एजन्सी (कांतिलाल) व उल्हासनगर-५ मधील प्रताप गॅस एजन्सी (भारत गॅस वितरक) यांनी सामान्य ग्राहकांची फसवणूक करणे मोठ्या प्रमाणात सुरू केले आहे. या दोन्ही एजन्सींच्या कारभारातील अनियमिततेमुळे नागरिक हैराण झाले आहेत.

प्रमुख उपस्थिती (शिष्टमंडळ)

या वेळी शिष्टमंडळात भीमसेन मोरे (उपजिल्हाप्रमुख, अंबरनाथ विधानसभा), प्रशांत धांडे (माजी नगरसेवक), राज प्रकाश महाडिक (अंबरनाथ विधानसभा युवा सेना अधिकारी), अंकुश भांडे (शहराधिकारी, युवासेना), दहीर रामटेके (युवा सेना शहर समन्वयक), रवी दिवटे (विभाग प्रमुख), सुनील साळुंखे (उपविभाग प्रमुख), यशवंत नेटकर (उपविभाग प्रमुख), गणेश शेंडगे (शाखा प्रमुख) यांचा समावेश होता.

कांतिलाल एचपी गॅस एजन्सीवर आरोप – डिलिव्हरी बॉयचा अभाव, स्टॉक तुटवडा.

शिवसेना (उद्धव बाळासाहेब ठाकरे) च्या शिष्टमंडळाने स्पष्ट केले की, कांतिलाल एजन्सीकडे डिलिव्हरी बॉयचा अक्षरशः अभाव आहे. यामुळे वृद्ध, आजारी, महिला व अपंग ग्राहकांना स्वतः एजन्सीवर येऊन गॅस सिलिंडर आणावे लागतात. शिवाय, प्रथम एजन्सीवरून पावती घ्यावी लागते व नंतर समतानगर, उल्हासनगर-४ येथील गोडाऊनवर जाऊन स्वतः सिलिंडर आणावा लागतो. या दुहेरी पायपिटीमुळे नागरिक त्रस्त आहेत.

बुकिंग केल्यानंतरही ग्राहकांना १० ते २० दिवसांनी गॅस मिळत असल्याने अनेक कुटुंबांना स्वयंपाक करणे दुष्कर झाले आहे. सततचा स्टॉक तुटवडा व काळाबाजाराची शक्यता लक्षात घेता, या एजन्सीची त्वरित झडती तपासणी करून उपलब्ध स्टॉक व बुकिंग रेकॉर्ड जप्त करण्याची मागणी करण्यात आली. तसेच डिलिव्हरी बॉयच्या अभावाची दखल घेऊन तात्काळ नियुक्ती करण्याचे आदेश द्यावेत, अन्यथा एजन्सीचा परवाना रद्द करावा, असे आवाहनही करण्यात आले.

प्रताप गॅस एजन्सीकडून बनावट नोंदी व ग्राहक फसवणूक – डॉ. चौधरी यांची तक्रार.

प्रताप गॅस एजन्सीचे प्रकरण अधिक गंभीर असल्याचे शिष्टमंडळाने सांगितले. डॉ. श्याम भूपेंद्र चौधरी (B.H.M.S.) यांनी केलेल्या तक्रारीनुसार, या एजन्सीने त्यांच्या नकळत त्यांच्या नावावर बुकिंग क्रमांक ४०२ ची बनावट नोंद केली व ते सिलिंडर त्यांना न देता अन्य व्यक्तीला देऊन टाकले. फक्त खोटा डिलिव्हरी मेसेज तक्रारदाराला पाठविण्यात आला.

तक्रारदार आठ दिवस एजन्सीवर जाऊन आल्यानंतरही एजन्सी कर्मचारी पालथा उत्तरे देत आहेत आणि बुकिंग आयडी ४०२ चा वितरण रेकॉर्ड दाखविण्यास टाळाटाळ करीत आहेत. यावरून ही एजन्सी अॅपद्वारे परस्पर गॅस सिलिंडर बुक करून काळाबाजार करत असल्याचा स्पष्ट संशय आहे. शिष्टमंडळाने या प्रकरणी म्हटले की, "ही फक्त एक तक्रार नाही, तर संपूर्ण गॅस वितरण यंत्रणेतील भ्रष्टाचाराचे प्रतिबिंब आहे."

शिष्टमंडळाच्या प्रमुख मागण्या.

१. एचपी गॅस एजन्सी (कांतिलाल) व प्रताप गॅस एजन्सीच्या सर्व नोंदी, बुकिंग रेकॉर्ड, वितरण पावत्या व ग्राहक तक्रार नोंदवही त्वरित जप्त करून स्वतंत्र तपासणी करावी.

२. डिलिव्हरी बॉयच्या अभावामुळे होणारी गैरसोय थांबविण्यासाठी तात्काळ नियुक्तीचे आदेश द्यावेत, अन्यथा परवाना रद्द करावा.

३. काळाबाजाराच्या संभाव्यतेची स्वतंत्र तपासणी करण्यासाठी अन्न व पुरवठा विभागाला सूचित करावे.

४. डॉ. श्याम भूपेंद्र चौधरी यांना हक्काचे सिलिंडर त्वरित मिळवून द्यावे.

५. तपास अहवाल व केलेल्या कारवाईची माहिती शिवसेना (उद्धव बाळासाहेब ठाकरे) पक्षाच्या शिष्टमंडळाला कळवावी.

शिष्टमंडळाने स्पष्ट केले की, ही केवळ गॅस एजन्सींची अनियमितता नसून सामान्य माणसावर होणारा अन्याय आहे. प्रशासनाने त्वरित कारवाई न केल्यास पक्षातर्फे या एजन्सींसमोर थेट आंदोलन करण्यात येईल, असा इशाराही देण्यात आला आहे.