धम्मध्वज तथा मशाल यात्रेचे भंडारा येथे आगमन 20 रोजी

"साप्ताहिक जनता की आवाज"

वृत्त प्रतिनिधी 

भंडारा :- महाबोधी महाविहार बुद्धगया चे प्रबंधन बौद्धांच्या हाती सोपवावे, तसेच बीटी अॅक्ट निरस्त करण्यात यावे या मागणीसाठी संपूर्ण भारतभर जनजागृती व्हावी या उद्देशाने या मुक्ती आंदोलनाचे प्रेरक पूज्य विनाचार्य तथा भदंत ज्ञानज्योती यांच्या नेतृत्वात धम्मध्वज यात्रा भारतभर भ्रमण करित आहे. त्याचप्रमाणे भदंत धम्मशिखर यांच्या नेतृत्वात मशाल यात्रेचे सुद्धा भ्रमण सुरु आहे.

या दोन्ही यात्रा दि. २० सप्टेंबर २०२५ ला भंडारा येथे येत आहेत. भंडाऱ्यात सुद्धा ह्या दोन्ही यात्राचे

स्वागत व पूज्य भदंत यांचे मार्गदर्शनाचा कार्यक्रम आयोजित करण्यात आलेला आहे. सदर कार्यक्रम इंद्रलोक सभागृह, नागपूर रोड येथे होणार आहे. तत्पुर्वी धम्मध्वज यात्रेला दुपारी ५ वाजता मैत्रेय बुद्ध विहार, नाशिक नगर येथून सुरुवात होवून शास्त्री चौक होत गांधी चौक ते त्रिमूर्ति चौकात येईल, इंद्रलोक सभागृहात यात्रेचे सभेत रूपांतर होवून पूज्य भंते तथा मान्यवरांचे मार्गदर्शन बोधगया महाविहाराच्या मुक्ती आंदोलनाची दिशा व भूमिका लोकांसमोर मांडली जाईल. सभेला पूज्य भंते ज्ञानज्योती, मा. विनाचार्य, भंते सुरेई ससाई,

भन्ते धम्मशिखर व मान्यवरांची उपस्थिति राहणार आहे.

भंडारा शहरातील सर्व बौद्ध उपासक, उपसिकांना कार्यक्रमस्थळी उपस्थित राहावे तसेच धम्मध्वज यात्रेमध्ये मोठ्या संख्येने सहभागी व्हावे असे आवाहन महाबोधी महाविहार मुक्ती आंदोलन समिति भंडारा जिल्हा यांच्यातर्फे करण्यात येत आहे. कार्यक्रमाच्या पूर्वी महाराष्ट्राचे सुप्रसिद्ध गायक विकास राजा भीमबुद्ध गीतांद्वारे प्रबोधनाचा कार्यक्रम करतील असे आयोजन समिति तर्फे कळवण्यात आले आहे.