झाडीबोलीच्या साहित्यवैभवाचा वर्धापन दिन! श्री संताजी महाविद्यालयात 'झाडीबोली'चा चौतिसावा वर्धापन दिन उत्साहात संपन्न.

नरेंद्र मेश्राम 

"साप्ताहिक जनता की आवाज"

 

​पालांदुर :- प्श्री संताजी कला व विज्ञान महाविद्यालय, पालांदुर येथे राष्ट्रसंत तुकडोजी महाराज यांच्या पुण्यतिथीनिमित्त आयोजित कार्यक्रमात, झाडीबोली शाखा, पालांदूर आणि राष्ट्रीय सेवा योजना विभाग यांच्या संयुक्त विद्यमाने झाडीबोलीचा ३४ वा वर्धापन दिन सोहळा अत्यंत उत्साहात व दिमाखात पार पडला.

​झाडीबोलीच्या या साहित्य-यात्रेचे अध्यक्षस्थान महाविद्यालयाचे प्रभारी प्राचार्य डॉ. गिरीश लांजेवार यांनी भूषवले. याप्रसंगी सरस्वती विद्यालय, पालांदूर येथील अध्यापक, सुविख्यात वक्ते श्री. हरिश्चंद्र लाडे यांनी प्रमुख वक्ते म्हणून व्यासपीठाची शोभा वाढवली. त्यांच्यासोबत डॉ. रवी पाटेकर, डॉ. दीपक आंभोरे आणि डॉ. संजयकुमार निंबेकर यांचीही सन्माननीय उपस्थिती लाभली.

​वक्ते श्री. हरिश्चंद्र लाडे यांनी आपल्या ओजस्वी वाणीतून झाडीबोलीचे महत्त्व अधोरेखित केले. "झाडीबोली ही आपल्या परिसराची अस्मिता आहे आणि तिचे जतन करणे हे आपले आद्य कर्तव्य आहे," असे ते म्हणाले. "या बोलीतून जे साहित्य निर्माण होईल, ते निश्चितच अक्षर ठरेल आणि मराठी भाषेच्या समृद्धीस ते महत्त्वपूर्ण योगदान देईल. यासाठी तरुणांनी आपल्या बोलीतून साहित्य निर्माण करावे," असे कळकळीचे आवाहन त्यांनी केले.

​यानंतर बोलताना डॉ. संजयकुमार निंबेकर यांनी अत्यंत महत्त्वपूर्ण युक्तिवाद मांडला. "बोली टिकली तरच भाषा टिकेल. मराठी भाषेला अभिजात भाषेचा दर्जा मिळाला आहे, हा दर्जा टिकवून ठेवण्यासाठी आपल्या परिसरातील बोलींना बळकट करणे अत्यंत महत्त्वाचे आहे," यावर त्यांनी विशेष भर दिला. साहित्य क्षेत्राकडे आणि आपल्या बोलीभाषेकडे सर्व तरुणांनी सकारात्मक दृष्टिकोनातून पाहिले पाहिजे, असा संदेश त्यांनी दिला.

​व्यासपीठावरील अन्य मान्यवरांनीही यावेळी समुचित आणि प्रेरणादायक भाषणे केली. कार्यक्रमाला महाविद्यालयातील असंख्य विद्यार्थी आणि परिसरातील काही जागरूक नागरिक मोठ्या संख्येने उपस्थित होते. झाडीबोली शाखा, पालांदूरच्या वतीने या अर्थपूर्ण कार्यक्रमाचे आयोजन करण्यात आले होते.

​कार्यक्रमाचे सुत्रसंचालन प्रा. मनोज मोहतुरे यांनी अतिशय प्रभावीपणे केले, तर उपस्थित सर्वांचे आभार प्रदर्शन डॉ. नितीन थुल यांनी मानले. या सोहळ्याने झाडीबोलीच्या साहित्य वैभवाला एक नवी दिशा दिली, असे मत उपस्थितांनी व्यक्त केले.